Bakı Xoreoqrafiya Akademiyasının (BXA) orta ixtisas təhsili pilləsinin təşkilatçılığı ilə Azərbaycan Respublikasının Prezidenti, Ali Baş Komandan İlham Əliyevin ad günü münasibətilə tədbir keçirilib.

Tədbirdə BXA-nın rəhbərliyi, müəllim-tələbə heyəti, media və incəsənət nümayəndələri ilə yanaşı, Bakı Dövlət Universitetinin Avropa və Amerika ölkələrinin yeni və müassir tarixi kafedrasının Tarix üzrə fəlsəfə doktoru dosent Məmmədağa Baxışov və Mətbuat Şurasının icraçı katibinin müavini Fəridə Ağazadə iştirak edib.

Tədbir Azərbaycan Respublikasının Dövlət Himni ilə açıq elan olunub.

Ədəbi və bədii hissədən ibarət olan tədbirdə orta ixtisas təhsili pilləsinin tələbələrinin çıxışlarında İlham Əliyevin həyat və fəaliyyəti, dünya siyasi arenasında mövqeyi, Qarabağ müharibəsində onun başçılığı altında Milli Ordumuzun əldə etdiyi şanlı qələbəyə dair məlumatlar verilib, şeirlər səsləndirilib, rəqs kompozisiyaları nümayiş olunub.

Tədbir çərçivəsində orta ixtisas təhsili pilləsinin müəllimləri: Mehriban Haqverdiyeva və Aygül Qurbanovanın təşəbbüsü ilə nəşr edilən “Qalib sərkərdə” adlı jurnalın təqdimetmə mərasimi keçirilib.

Jurnal Prezidentin həyat yolu və eyni zamanda apardığı uğurlu siyasətin, Qarabağ müharibəsi, Xarıbülbül festivalı, COP-29 və digər dövlət əhəmiyyətli fəaliyyət sahələrindən bəhs edən məqalələr toplusudur.
Jurnalın baş redaktoru BXA orta ixtisas təhsili pilləsinin direktoru Xatirə Tahirova, redaktorları- Pərvanə Həsənova, Lalə Haqverdiyeva, Aysel Əhmədova, dizayneri isə Pərvin Quliyevadır.

Tədbirə dəvət olunan qonaqlar çıxışları zamanı ictimaiyyət adından ölkə başçısı, Ali Baş Komandan cənab İlham Əliyevi ad günü münasibətilə təbrik ediblər.

Daha sonra Ulu Öndər Heydər Əliyevin və Dövlət başçımız İlham Əliyevin zəngin həyat və siyasi fəaliyyətini, milli-mənəvi dəyərləri, azərbaycançılıq ideologiyasını özündə əks etdirən kitab sərgisi nümayiş olunub.