- Xurda xanım, xoş gördük. Müsahibəmizə bu sualla başlayaq. Necə oldu ki, riyaziyyat fənninə marağınız oldu?

- Bu həvəsi məndə atam yaradıb. Mən özüm ədəbiyyatçı olmaq istəyirdim. Çünki az - çox yazmağı bacarırdım. İndi də yazıb - pozuram. Atam da ədəbiyyat müəllimi idi. Amma mənim çətinliyə düşməməyim üçün məni bu sahəyə yönəltdi.

- Neçə ildir ki, riyaziyyat fənnini tədris edirsiniz?

- Qırx iki ildir ki, bu fənn üzrə dərs deyirəm.

- Hansı yaş qrupuna aid uşaqlara dərs deyirsiniz?

- Yaş məhdudiyyəti yoxdur. Müxtəlif yaş qrupuna aid olan şagirdlərlə işləyirəm.

- Hansı proqramlarla işləyirsiniz?

- İndi müasir dövrdə standart proqramlara əsaslanmaq olmur. Gərək özün də bir yenilik edəsən. Konkret deyə bilmərəm, amma özümün metodik vəsaitlərim, məqalələrim dərc olunub.

- Xarakter olaraq necə biridir Xurda xanım?

- Mülayim bir insanam. Kənardan özümdən razı kimi görünsəm də, elə deyil.

- O dövrdəki təhsillə indiki təhsil arasında hansı fərqləri görürsünüz?

- Məncə, fərq yalnız terminlərin dəyişməsidir. Bəzən "müasir üsul" deyirlər. Bu müasir üsul da ənənəvi üsulun əsasındadır. Bəlkə də biz indi müasir terminlərə uyğunlaşa bilmirik. Dilimiz uyğunlaşmır.

- Çalışdığınız "Elmland" tədris mərkəzində uşaqların bilik səviyyəsi sizi qane edirmi?

- Uşaqların səviyyəsi məni qane edir. Düşünürəm ki, bundan sonra daha da yaxşı olacaq.

- Valideynlərə nə məsləhət görərdiniz?

- Valideynlərə bir türk yazarı Nurəddin Topçunun dili ilə demək istəyirəm ki, müəllim gənclərə bilmədiklərini öyrədən bir elm xalçası deyil, bu iş kitabın işidir, övladlarınızı oxumağa, öyrənməyə sövq edin.

- Bəs həmkarlarınıza hansı tövsiyələri verərdiniz?

- Bizim dünya səviyyəli neftçi alimimiz Azad Mirzəcanzadə deyir ki, riyaziyyat hər yerdə var. Ədəbiyyatda, biologiyada, tarixdə, fizikada, kimyada, coğrafiyada da riyaziyyat var. Ona görə müəllimlər, riyaziyyatı uşaqlara sevdirin! Bu baxımdan, biz müəllimlərin üzərinə böyük məsuliyyət düşür. Bizim vəzifəmiz ElmLand tədris mərkəzinə gələn uşaqlara riyaziyyatı sevdirmək, onları riyaziyyat üzrə inkişaf etdirməkdir və bunu da imkan dairəsində etməyə çalışırıq. ElmLand tədris mərkəzi işə yeni başlayır, necə deyərlər, körpə bir fidandır, onun böyüyüb, qol - qanad atması üçün əlimizdən nə gəlirsə edəcəyik və sonda tədris mərkəzinə uğurlar arzulayıram.

- Mən bu işi seçərkən ağlıma gəlməzdi ki,.. Bu fikri özünüz tamamlayın, zəhmət olmasa.

- Universitetə daxil olanda elə bilirdim ki, çox böyük bir elm xadimi olacağam. Amma təəssüf ki, orta məktəbdən kənara çıxa bilmədim (gülür).

Əlaqə nömrəsi: (055) 292 20 03

"Elmland" tədris mərkəzi




скачать dle 10.6фильмы бесплатно