Özbəkistan Dövlət Xoreoqrafiya Akademiyasının rektoru, professor Şuxrat Toxtasimov Bakı Xoreoqrafiya Akademiyasında (BXA) qonaq olub.

Öncə Şuxrat Toxtasimovun BXA-nın rəhbərliyi ilə görüşü keçirilib. Görüş zamanı hər iki ali təhsil müəssisəsi arasında əlaqələrin möhkəmlənməsinə yönəlmiş gələcək elmi və digər layihələrin həyata keçirilməsi müzakirə olunub. Özbəkistanlı rektora akademiyanın fəaliyyəti, təhsil, tədris prosesi və nailiyyətləri barədə məlumat verilib.

Daha sonra Ş. Toxtasimov BXA-nın tam orta məktəb və orta ixtisas təhsili pillələrinin şagird və tələbələrinin dərslərində iştirak edib, onlara klassik rəqsdə icra olunan hərəkətlərin incəliklərini nümayiş etdirib və əlavə tövsiyələrini verib. O, dəzgah qarşısında çıxış edən şagird və tələbələrin rəqs hərəkətlərini fənn müəllimləri ilə müzakirə edib.

Eyni zaman, Özbəkistan Dövlət Xoreoqrafiya Akademiyasının rektoru BXA-nın orta ixtisas təhsili pilləsinin məzunlarına diplomların təqdimetmə mərasimində iştirak edib və bir neçə məzuna diplomlarını təqdim edib.