- Ülviyyə xanım, zaman sizi haradan hara gətirdi?

- 2003-cü ildə yüksək balla Dövlət Tibb Universitetinə daxil oldum. 2009-cu ildə oranı bitirdim. Bir il internatura keçdim. 2010-cu ildən 2014-cü ilə qədər "Ailəm" klinkasında çalışdım. Daha sonra müxtəlif özəl klinikalarda və idman layihələrində işlədim. Qeyd edim ki, universiteti bitirdikdən sonra və çalışdığım illər ərzində Türkiyədə və Almaniyada (Siegen və Mannheim şəhərlərində) təkmilləşmə kursları keçdim. Hal-hazırda “İnternational Medical Center 1“ klinklasında fəaliyyətimi davam etdirirəm.

- Öz istəyinizləmi həkim oldunuz?

- Bəli, ailəmdə həkimlər çoxdur. Gözümü açıb həkimlər gördüyümə görə düşünmüşəm ki, mən də həkim olacağam. Başqa bir ixtisas barədə heç vaxt fikirləşməmişəm.

- Ümumilikdə neçə ildir fəaliyyət göstərirsiniz?

- Artıq on ildir ki, bu sahədəyəm.

- Bu on ilə nəyi sığışdıra bilmədiniz?

- Bir həkim üçün nəinki on il, hətta əlli il də kifayət etmir nələrisə sığışdırmağa. Çünki tibb dayanmadan inkişaf etməkdədir. Biz də o yeniliklərlə ayaqlaşmağa məcburuq.

- Niyə məhz plastik cərrahiyyəni seçdiniz?

- Hər zaman gözəllik yaratmağı sevdiyim üçün Türkiyədə plastik cərrahiyyə üzrə ixtisaslaşıb bu sahəyə yiyələndim.

- Bütün növ plastik əməliyyatları icra edirsiniz?

- Bəli, istisna yoxdur.

- Bir həkim olaraq nədən qorxursunuz?

- Bir həkim olaraq ancaq pasientlərimizin sağlamlığı bizi narahat edə bilər.

- Xarakter olaraq necə birisiniz?

- Deməzdim ki, hər xırda nəyəsə görə narahat olan biriyəm. Nəsə məni narahat edirsə, deməli, çox vacib məsələdir. Hər xırda məsələni böyüdən deyiləm.

- Nəyə qətiyyətlə "yox"deyirsiniz?

- Şəxsi həyatımda uşaqlarımın şirniyyat yeməsinə "yox" deyirəm (gülür). Həkimlik fəaliyyətimdə isə çox böyük çəkili insanları əməliyyata almağın əleyhinəyəm. Çünki bu növ insanlar bizim əməliyyatlardan fayda görməzlər. Hətta əməliyyat onların sağlamlıqlarına da ziyan vura bilər. Belə halları nəzərə almalıdırlar. Əməliyyatdan öncə arıqlamalıdırlar. Biz arıqlatmırıq, bədəni şəkilləndiririk.

- Son zamanlarda xanımlarda sanki bir standartlaşma baş verir. Eyni burun, eyni dodaq, eyni yanaq və s. Bunu nə ilə əlaqələndirirsiniz?

- Düzdür, indi çoxları bir-birinə oxşamağa başlayıb. Amma mən onun əleyhinəyəm. Hər sima individualdır. Mən icra etdiyim bütün əməliyyatlarda təbiiliyi qorumağa çalışıram.

- Sizə daha çox hansı əməliyyatlarla bağlı müraciətlər olunur?

- Daha çox burun, yanaq və bədənşəkilləndirmə əməliyyatları istəyirlər. Bədənşəkilləndirmə əməliyyatı lap çox dəbdədir. Onu da qeyd edim ki, son zamanlarda xanımlarla yanaşı bəylər də çox müraciət etməyə başlayıblar.

- Oxuculara nə məsləhət görürsünüz?

- Məsləhət görürəm ki, gözəllikləri ilə yanaşı öz sağlamlıqlarına da fikir versinlər. Çünki bəzən pasientlər öz sağlamlıqlarını itirməkləri bahasına gözəl olmaq istəyirlər. Bu, yolverilməzdir. Sağlam qalaraq gözəlləşmək lazımdır.

- Mən Hippokrat andını içərkən ağlıma gəlməzdi ki,.. Bu fikri tamamlayın, zəhmət olmasa.

- Mən Hippokrat andı içərkən ağlıma gəlməzdi ki, bu peşə bu qədər ağır, məsuliyyətli və eyni zamanda fərəhverici peşədir. Çünki insanlara yardım etmək və eyni zamanda bu yardım zamanı ağır məsuliyyət, bu peşəni seçdiyim üçün hər dəfə məndə əminlik yaradır.

Həkimlə əlaqə: (070) 3910026