- Rüxsarə xanım, necə oldu ki, bu sahəyə gəldiniz?
- Müəllimlik fəaliyyətimə 2002-ci ildən başlamışam. Bakı Dövlət Universitetini və Mingəçevir Müəllimlər İnstitutunu bitirmişəm. Fəaliyyət göstərdiyim dövrdə dövlətimiz, Prezidentimiz və Təhsil Nazirliyi tərəfindən əməyim yüksək qiymətləndirilib. 2011-ci ildə qabaqcıl iş təcrübəm respublika səviyyəsində yayılıb. 2012-ci ildə ilin ən yaxşı müəllimi müsabiqəsinə qoşulmuşam. İlin ən yaxşı yüz müəllimidən biri fəxri adını qazanmışam. 2018-ci ildə Cənab Prezidentimiz İlham Əliyevin sərəncamı ilə tərəqqi medalı ilə təltif olunmuşam. Hal-hazırda Bərdə şəhəri, səkkiz nömrəli tam orta məktəbin ibtidai sinif müəllimi və ibtidai siniflər üzrə direktor müavini ikimi fəaliyyətimi davam etdirirəm. Qeyd edim ki, bu sahəyə gəlməyim uşaqlara olan sevgimdən irəli gəldi. Uşaqların gözlərində sevinci gördükdə xoşbəxt oluram və işimə olan sevgim daha da artır.
- Neçə ildir ki, bu sahədəsiniz?
- 2002-ci ildən ibtidai sinif müəllimi,2012-ci ildən isə ibtidai siniflər üzrə direktor müavini kimi çalışıram.
- İş prinsipiniz nədən ibarətdir?
- Dəqiqlik, dürüstlük və məsuliyyət mənim üçün çox önəmlidir. Sagirdlərə və çalışdığım kollektivin müəllimlərinə hər zaman nümunə olmağa çalışmışam. Çünki insan öz əməli ilə nümunə olmalıdır. Bundan başqa sadəlik mənim üçün baş tacıdır. Hər bir şagird və valideyn mənimlə öz dərdini və qayğısını rahatlıqla bölüşə bilirlər.
- Ailəlisinizmi?
- Ailəliyəm. Üç övladım var. Böyük övladım İqbal Mirzəzadə Kənd Təsərrüfatı idarəsində baş mühasib olaraq çalışır. İkinci övladım Qoşqar Mirzəzadə Gəncə Dövlət Universitetinin bitirib. Banklardan birində böyük mütəxəssis vəzifəsində işləyir. Qızım Mənzər Mirzəzadə isə Qafqaz Universitetini qırmızı diplomla bitirib. O da MİQ imtahanında rayon birincisi olaraq öz işlədiyim səkkiz saylı tam orta məktəbə ingilis dili müəllimi kimi təyin olunub. Onu da qeyd edim ki, böyük oğlum Mirzəzadə İqbal ikinci Qarabağ müharibəsində könüllü olaraq müharibəyə yollanıb. Müharibə veteranıdır. Bir neçə rayonun azad olunmasında iştirak edib.
- Ən böyük məqsədiniz nədir?
- Ən böyük məqsədim çalışdığım məktəbin şagirdlərini təkcə biliklə təmin etmək yox, onlara əsl vətəndaş olmağı, vicdanlı, ədalətli olmağı aşılamaqdır. Bu işin də öhdəsindən layiqincə gəldiyimi düşünürəm. Şagirdlərimin uğurları məni sevindirir. Onu da qeyd edim ki, ibtidai sinifdə dərs dediyim 11 "B" sinfi bu il qəbul imtahanda yüz faizlik nəticə göstərib. Heç biri imtahandan kəsilmədən respublikanın ən yaxşı universitetlərinə qəbul olublar. Bu da böyük bir uğurdur.
- Bir mütəxəssis olaraq nəyə "yox" deyirsiniz?
- İnsanların yalançılığı və məsuliyyətsizliyinə "yox" deyirəm. Yalan danışan və məsuliyyəti olmayan bir şagirdin gələcəkdə heç bir uğurundan danışmaq olmaz.
- Müəllimlik fəaliyyətindən başqa bir işlə məşğul olursunuzmu?
- Bəli, uzun müddətdir ki, Azərbaycan Respublikası Təhsil İnstitutunun təlimçisiyəm. Ölkənin daxilində istər müəllimlərə, istər direktor və müavinlərə müəyyən mövzularda təlimlər keçirəm.
- Mən bu sahəyə gələrkən ağlıma gəlməzdi ki,..Bu fikri özünüz tamamlayın, zəhmət olmasa.
- Müəllimlik peşəsi elə bir peşədir ki, burada başqalarının uğuruna daha çox sevinirsən. Dərs dediyim uşaqlar ali məktəbə daxil olanda onların sevinclərini təbii ki, şərik oluruq. Amma ağlıma gəlməzdi ki, onlar sevinclərini ilk olaraq öz ibtidai sinif müəllimləri ilə bölüşəcəklər. O sevinci heç nə ilə ölçmək və əvəz etmək mümkün deyil. Heç vaxt inanmazdım ki, bu qədər xoşbəxt olaram.

Əlaqə nömrəsi: (050) 660 35 33