- Fidan xanım, necə oldu ki, bu sahəyə gəldiniz?

- Uşqlıqdan kiməsə yeni şeylər öyrətmək, kiminsə həyatına yeniliklər qatmaq mənim ən sevdiyim şeylərdən biri olub. Amma heç vaxt düşünməzdim ki, alman dili müəllimi olacağam. Düzdür, uşaq olarkən cizgi filmərinə baxanda mənə Almaniya həmişə maraqlı gəlirdi. Fikirləşirdim ki, mən orada nə zamansa ola bilərəmmi? Alman dilini öyrənməyi bacararammı?Orta məktəbi bitirərkən qarşıma məqsəd qoymuşdum ki, tələbələrim tərəfindən sevilən, dürüst və vicdanlı bir müəllim olacağam. Amma sırf alman dili müəllimi olacağımı bilmirdim. Anam ya həkim, ya da xarici dil müəllimi olmağımı istəyirdi. Belə deyək ki, mənim alman dili müəllimi olmağım anamın xəyallarından birdir. Bu peşəni də mənim üçün o seçib. Fürstədən istifadə edib, ona öz minnətdarlığmı bildirirəm. Yaxşı ki, bu peşəni seçmişəm. 2017-ci ildə Xarici dillər Universitetinin alman dili müəllimliyi fakültəsinə daxil oldum. Universitetdə oxuyarkən məqəsdim bu dili dərk edərək öyrənmək olub. Hal-hazırda Almaniyada magisturatura təhsili alıram. Qarşımda iki seçim var idi. Ya Bakıda, ya da xarici ölkələrdən birində magistr təhsili alacaqdım. Bakıda bir çox kurslarda və liseylərdə fəalliyyət göstərməyimə baxmayaraq, xaricdə təhsil almağı seçdim. Qeyd edim ki, Azərbaycandakı tələbələrimə həmçinin, Almaniyada olan tələbələrə də halhazırda onlayn dərslər keçirəm. Bəzən məndən soruşurlar ki, niyə bu qədər dərs keçirsən? Dərs keçmək, insanları məlumatlandırmaq mənim həyatımın bir parçasıdır.

- Neçə ildir ki, bu sahədəsiniz?

- Neçə ildir? Sanki həmişə bu sahədə olmuşam. Amma rəsmi olaraq 7 ilə yaxındı ki, müəlliməm. Hər dərs keçəndə elə hiss edirəm ki, özüm də yenidən öyrənirəm, yenidən böyüyürəm.

- Öz sahəniz üzrə hansı işləri icra edirsiniz?

- Sadəcə alman dili öyrətmirəm. Mən insanlara inanmağı öyrədirəm – özlərinə inanmağı, “mən bacararam” deməyi öyrədirəm. Bəzən tələbələrim dərsə yorğun, ümidsiz gəlir, amma dərsin sonunda onların gözündəki qığılcımı görəndə bilirəm ki, doğru yoldayam. Bir müəllim kimi mənim işim yalnız qrammatika izah etmək deyil, dili sevdirib onunla yaşamağı öyrətməkdir.

- İş prinsipiniz nədən ibarətdir?

- Vicdan, sevgi və məsuliyyət. Müəllim əgər ürəyini işinə qoymasa, nə qədər bilikli olsa da, tələbəyə toxuna bilməz. Mənim üçün əsas prinsip budur: tələbə sadəcə dərsi başa düşməsin, onu hiss etsin, öyrəndiyini sevərək qəbul etsin. O zaman bilik ömürlük qalır. Qeyd edim ki, mən öz peşəmə hər zaman "Mən dərs demirəm, sevdiyim işi yaşayıram" şüarı ilə yanaşmışam"

- Bir mütəxəssis olaraq nəyə “yox” deyirsiniz?

- Qorxuya və bəhanələrə. “Bu dili öyrənə bilmərəm”, “məndən alınmır” – bu cümlələrə dərsimdə yer yoxdur. Bəzən tələbə özü-özünü inandırır ki, o, bacarmayacaq. Amma mən ona sübut edirəm ki, bacaracaq! Bir də müəllimliyin sadəcə maaş üçün edildiyi yanaşmaya “yox” deyirəm. Müəllimlik könül işidir, onu ürəkdən sevməsən, bu peşədə qala bilməzsən.

- Son zamanlarda sizə daha çox nə ilə bağlı müraciətlər olur?

- Əsasən Almaniyaya köçmək, iş və təhsil üçün alman dili öyrənənlər çoxdur. Amma məni ən çox sevindirən tələbələrimdən “Mən sadəcə bu dili sevdiyim üçün öyrənirəm” deyənlərdir. Bu, mənim üçün qələbədir! Çünki insan sevdiyi şeyi daha rahat öyrənir.

- Xarakter olaraq necə birisiniz?

- Müəllim kimi səbirli, motivasiyaedici və tələbələrimə qarşı həmişə anlayışlıyam. Amma öz üzərimdə də daim işləyən biriyəm. Çünki bir müəllim özü öyrənməzsə, başqasına nə verə bilər? Ən böyük xüsusiyyətim isə budur: mən tələbələrimə sadəcə müəllim deyiləm, həm də bir dostam.

- Ailəlisinizmi?

- Bu suala çox şəxsi yanaşmıram, amma bir şeyi deyə bilərəm ki, müəllim olan insanın ailəsi təkcə öz doğmaları olmur. Tələbələrim də mənim ailəmdir. Onların uğuru mənim uğurum, onların sevinci mənim sevincimdir.

- Oxuculara nə məsləhət görürsünüz?

- Həyatda nəyi öyrənmək istəyirsinizsə, qorxusuz başlayın. Öyrənməkdən çəkinməyin. Səhv etməkdən utanmayın, çünki səhv etmədən inkişaf yoxdur. Bir də unutmayın: dil öyrənmək kitab səhifələrində deyil, gündəlik həyatda baş verir. Onu yaşayın, danışın, dinləyin, hiss edin!

- “Mən bu sahəyə gələrkən, ağlıma gəlməzdi ki…”
…tələbələrimin uğurlarına öz uğurum kimi sevinəcəyəm. Mən elə bilirdim ki, müəllim sadəcə dərs keçən biridir. Amma zamanla anladım ki, müəllim tələbələrinə ruh verən, onlara inam aşılayan, bəzən bir sözlə həyatlarını dəyişən insandır. Müəllim olmaq sadəcə bir peşə deyil – bu, bir həyat tərzidir, bir missiyadır.

Əlaqə nömrəsi: (070) 862 51 09