- Leyla xanım, necə oldu ki, bu sahəyə gəldiniz?

- Müəllimliyə olan sevgim və uşaqlıqdan insanlara faydalı olma istəyim məni bu sahəyə gətirdi. Hər zaman başqalarına yeni biliklər qazandırmaq və onların inkişafına töhfə vermək arzusunda olmuşam. Hal-hazırda Bakı şəhəri Xətai rayonu Murad Hacıyev adına 116 saylı tam orta məktəbin ingilis dili müəllimi kimi fəaliyyətimi davam etdirirəm.

- Neçə ildir ki, bu sahədəsiniz?

- Artıq 13 ildir ki, bu sahədəyəm və bu illər ərzində tədris və təlimçilikdə geniş təcrübə topladım.

- Öz sahənin üzrə hansı işləri icra edirsiniz?

- Hazırda orta məktəbdə ingilis dili müəllimi kimi dərs deyirəm və məktəbin Kiçik Akademiyasının prezidenti kimi fəaliyyət göstərirəm. Bundan əlavə, Fulbright proqramı ilə Amerikada təcrübə keçərək əldə etdiyim bilikləri şagirdlərimə və həmkarlarıma ötürürəm.

- Son zamanlarda sizə daha çox nə ilə bağlı müraciətlər olur?

- Əsasən tələbələr və müəllimlər İngilis dilində daha yaxşı danışmaq və öz fikirlərini əminliklə ifadə etmək barədə məsləhətlər istəyirlər. Eyni zamanda, dil öyrənmədə yeni yanaşmalar və metodlarla maraqlanan müəllimlərlə də işləyirəm.

- Bir mütəxəssis olaraq nəyə "yox", deyirsiniz?

- Təhsil prosesində yalnız nəzəriyyəyə əsaslanmağa “yox” deyirəm. Praktiki yanaşmaların əhəmiyyətinə inanıram və təhsil metodologiyamı da buna görə qurmağa çalışıram.

- Xarakter olaraq necə birisiniz?

- İşimə, tələbələrimə və öyrətməyə olan sevgim mənim həyatımın bir parçasıdır. Özümü daha çox səbirli, çalışqan və yaradıcı biri kimi görürəm. Eyni zamanda daim öyrənməyə və inkişaf etməyə açığam.

- Ailəlisinizmi?

- Xeyr, subayam.

- Oxuculara nə məsləhət görürsünüz?

- Öz arzularınızın arxasınca gedin və təhsildə özünüzə həmişə sərmayə qoyun. Çətinliklər olsa da, hər şeyin öyrənmək və özünü təkmilləşdirmək üçün bir fürsət olduğuna inanın.

- Mən bu işi seçərək ağlıma gəlməzdi ki,.. Bu fikri özünüz tamamlayın, zəhmət olmasa.

- Mən bu işi seçərkən ağlıma gəlməzdi ki, bir gün öz ölkəmi beynəlxalq səviyyədə təmsil edərək dünya təcrübələrindən ilhamlanacağam. Hər bir təcrübə mənə yalnız peşəkar yox, həm də insani tərəfdən böyümə imkanı verir.

Əlaqə nömrəsi: (051) 585 06 20