- Vüsalə xanım, necə oldu ki, bu sahəyə gəldiniz?

- Mən 1982-ci ildə Tərtər rayonunda anadan olmuşam. Bu sahəyə gəlməyimi anama borcluyam. Özü ali təhsil ala bilməmişdi. Ona görə də arzusu məni həkim görmək idi. Lakin mən jurnalist olmaq istəyirdim. Bütün fənləri yaxşı oxumuşam. Orta məktəbi fərqlənmə ilə bitirmişəm. İngilis-dili müəllimlərimə baxıb bu sahəyə marağım yarandı. Zaman elə gətirdi ki, ingilis-dili müəllimi oldum.

- Neçə ildir ki, bu sahədəsiniz?

- Artıq on beş ilə yaxındır ki, bu sahədə fəaliyyət göstərirəm. Mən repititor kimi fəaliyyətə başlamışam. Ailə vəziyyətimlə əlaqədar işləməyə bir müddət fasilə vermişəm. Amma ilk övladım dünyaya gəldikdən sonra yenidən həvəslə işləməyə başlamışam.

- Öz sahəniz üzrə hansı işləri icra edirsiniz?

- Mən daha çox abituriyentlər hazırlaşdırıram. Tələbələrim məni çox sevirlər. Sanki onların ikinci anasıyam. Onlar məni öz analarından seçmirlər, men də onları övladlarımdan fərqləndirmirəm. Bundan başqa, son iki ildə sertifikasiya müəllimlərə də hazırlaşdırmağa başlamışam. Bu da mənim uğurlarımın bəhrəsidir.

- Bir pedaqoq olaraq nəyə "yox", deyirsiniz?

- Qızlarımızın təhsildən və işdən uzaqlaşdırılmasının qəti surətdə əleyhinəyəm.

- Ailəlisinizmi?

- Bəli, ailəliyəm. İki övladım var.

- Xarakter olaraq necə birisiniz?

- Mülayim bir insanam.
Amma mənim də özümə görə sərhədlərim var. Qadının öz qadınlığını qoruyub saxlamağının tərəfdarıyam. Qadın davranışları ilə nümunə olmalıdır.

- Oxuculara nə məsləhət görürsünüz?

- İndi təhsilə maraq azdır. Biz tələbələrdə dərsə maraq yaratmalıyıq. Elmi onlara sevdirməliyik. Tələbələrə məsləhətim odur ki, dərsi məcburiyyətdən yox, sevə-sevə oxusunlar. Bir də ki, gələcəkdə kim olacaqlarına dair qərarı yalnız özləri versinlər.

- Mən bu işi seçərkən ağlıma gəlməzdi ki,.. Bu fikri özünüz tamamlayın, zəhmət olmasa.

- Ağlıma gəlməzdi ki, mən yaşadığım ərazidə məşhur bir müəllim olaram. İnanmazdım ki, hətta bölgələrdə də tanınaram. Bütün bu uğurlarıma görə Allahıma minnətdaram. Qeyd edim ki, mən iki oğul anası olaraq özümü çox xoşbəxt və şanslı hesab edirəm. Övladlarımı da gələcəkdə ziyalı kimi görmək ən böyük arzumdur.