- Təranə xanım, necə oldu ki, bu sahəyə gəldiniz?

- Mən ixtisasca həkiməm. Pediatriyanı bitirmişəm. 2014-cü ildən etibarən uşaq inkişaf mütəxəssisi kimi fəaliyyət göstərmişəm. Bəzi səbəblərə görə uzun müddət təhsilimə ara vermişdim. 2019-cu ildə qərar verdim ki, magistr təhsili alım. Türkiyədə təhsil aldım. Azərbaycanda həm uşaq həkimi, həm də uşaq inskisafı mütəxəssisi magistrını alan yeganə mütəxəssisəm. Bu sahədə özümüz daha da təkmilləşdirmək və yenilikləri öyrənmək üçün ində də öz üzərimdə çalışıram.

- Neçə ildir ki, bu sahədəsiniz?

- Artıq on ildir ki, bu sahədə fəaliyyət göstərirəm.  Bu on il ərzində müxtəlif ixtisas artırma kurslarına, təlimlərə, konfranslara və s. qoşulmuşam.

- Öz sahəniz üzrə hansı işləri icra edirsiniz?

- Uşaq inkişaf mütəxəssisi olaraq burada pediatr kimi fəaliyyət göstərirəm. Fərdi fəaliyyət göstərirəm. Uşaqların həm bu fiziki sağlamlığı, həm də psixoloji inkişafı ilə bağlı işlər görürəm.

- Son zamanlarda sizə daha çox nə ilə bağlı müraciətlər olur?

- Daha çox autistik əlamətlərdən şübhələnməklə gəlirlər. Bu əslində sevindirici haldır. 7-8 il bundan öncə valideynlər uşaqlarını dörd-beş yaşlarından sonra gətirirdilər. O zaman autizm diaqnozu təsdiqlənirdi. Amma indi uşaqları daha erkən vaxtlarda gətirirlər. Autizm klinik diaqnoz deyil, sindromdur. Neyro inkişaf pozuntusudur. Dünyada bunun nə yaranma səbəbi, nə də müalicəsi hələ tapılmayıb. Müxtəlif metodlar və yanaşmalar var. Təbii ki, hamısı valideynin fikrini qarışdırır. Erkən müdaxilə üçün çox müraciətlər olur. İnkişaf geriliyi çıxır və s. Hamısı autizm olmur. Autizm diaqnozu dörd yaşından sonra qoyulur.

- Bir mütəxəssis olaraq nəyə "yox"deyirsiniz ?

- Uşağa bir saat ərzində diaqnoz qoyulmasının əleyhinəyəm. Uşağın ailəsini, böyüdüyü mühiti, çevrəsini bilmədən diaqnoz qoymaq yolverilməzdir.

- Xarakter olaraq necə birisiniz ?

- Duyğusal, emosional biriyəm. Bununla yanaşı, daha çox analiz etmək qabiliyyətim var. Ona görə də pasiyentlərlə işləyəndə əziyyət çəkmirəm.

- Ailəlisinizmi?

- Bəli, ailəliyəm. Üç övladım var.

- Oxuculara nə məsləhət görürsünüz?

- Valideynlərə demək istərdim ki, uşaqlarında hər hansı bir narahatçılıq görsələr, gecikməsinlər. Vaxtında həkimə müraciət etsinlər. Çünki vaxtında olunan müdaxilə və müayinə, gələcəkdə yarana biləcək fəsadların qarşısının alınması deməkdir. Bir də ki, kompleks müayinəyə üstünlük versinlər.

- Mən bu işi seçərkən ağlıma gəlməzdi ki,.. Bu fikri özünüz tamamlayın, zəhmət olmasa.

- Mən bu sahəyə gələrkən düşünürdüm ki, uşaqları iynə-dərmansız, əməliyyatsız müalicə edəcəyəm. Bu arzuma da çatmağı bacardım.

Əlaqə nömrəsi: (055) 829 00 13