- Ceyran xanım, necə oldu ki, həkim oldunuz?

-  Biz ailədə altı bacı olmuşuq. Qardaşımız olmayıb. Mən də zirək olduğuma görə hər işə məni göndərirdilər. Hətta mənə "təcili yardım" da deyirdilər (gülür). Elə oldu ki, səkkizinci sinifdə oxuyarkən həkim olmaq qərarına gəldim. Çünki atam xəstə olanda ona mudaxilə edən həkimlərə qibtə ilə baxırdım. Atam isə pianoçu olmağımı istəyirdi. Çünki çox gözəl piano ifa edə bilirəm. Lakin mənim elə bir istəyim yox idi. Arzum həkim olmaq idi. Məktəbi də əla qiymətlərlə bitirib həkim oldum. Yaxşı ki, bu sahəyə gəldim. İşimi çox sevirəm.

- Neçə ildir ki, bu sahədəsiniz?

- 35 ildir ki, bu sahədə fəaliyyət göstərirəm.

- Öz sahəniz üzrə hansı işləri icra edirsiniz?

- Mən ixtisasca terapevtəm. Ailə həkimiyəm. Mən çalışıram ki, əsas müalicələri özüm edim. Şükür ki, nəticələrim də yüksək olub. Mən hələ də müxtəlif kurslara, seminarlara qoşulub öz biliyini təkmilləşdirmə.

- Son zamanlarda sizə daha çox nə ilə bağlı müraciətlər olur?

- Son zamanlarda virus infeksiyaları çoxalıb. Qeyd edim ki, mən pandemiya vaxtı yüzlərlə viruslu xəstələri müalicə etmişəm və ağırlaşan xəstələrim olmayıb. Hamısı sağalıb.

- Bir həkim olaraq nəyə "yox" deyirsiniz?

- Sosial şəbəkələrdə həkimliyə aid məsləhətlərin verilməsinə qəti surətdə "yox" deyirəm. Bir də ki, çox istərdim ki, həkimlərin yerinə görə qiymət verməsinlər. Bəzən deyirlər ki, filan həkim kənddə işləyir. Savadı azdır. Mən bu fikirlə razı deyiləm.

- Ailəlisinizmi?

- Ailəliyəm. İki övladım var. Hər ikisi də həkimdir.

- Oxuculara nə məsləhət görürsünüz?

- Məsləhət görürəm ki, həkimə vaxtında getsinlər. Profilaktik müayinələrdən keçsinlər. Çünki vaxtında olunan müdaxilə və müayinə gələcəkdə yarana biləcək fəsadların qarşısının alınması deməkdir.

- Mən bu işi seçərkən ağlıma gəlməzdi ki,.. Bu fikri özünüz tamamlayın, zəhmət olmasa.

- Mən Sovet dövründə oxumuşam. O zamanlar həkimə hörmət daha da çox idi. Ağlıma gəlməzdi ki, nə vaxtsa həkimə qarşı bəzi hörmətsizliklər olar.

Əlaqə nömrəsi: (050) 723 91 00