- Sabrina xanım, zaman sizi hardan hara gətirdi?

- İnsan yaşa dolduqca, daha da kamilləşir. Əvvəl daha qayğısız idim. Yaşım artdıqca, həyat yüküm daha da artır.

- Özünüzlə dartıb apara bilmədiyiniz bir yükünüz var?

- Allah hər kəsə qaldıra biləcəyi bir yük var. Mənim də özümə görə yüklərim var.

- Şüşəsindən çölə həsrət dağılan pəncərələrdən çox baxmısınız?

- Bəli, baxmışam.

- Nəyin həsrətini çəkmisiniz?

- Uzun illər övlad həsrəti çəkmişəm. Amma şükürlər olsun ki, Allah mənə övlad payı verdi.

- Nə vaxtsa, öz əlinizlə baltalanmısınız?

- Bəli, olub. Şəxsi həyatımda səhvlərim olub.

- Gözünüzdən nə düşüb?

- Mən insanpərəst biriyəm. Amma insanların çoxu gözümdən düşüb.

- Bəs gözünüz nəyə düşüb?

- Gözüm bir avtomobil var, ona düşüb (gülür)

- Ananın qızı olmaq çətindir, yoxsa qız anası olmaq?

- Ailə qurduqdan sonra anladım ki, qız anası olmaq daha çətindir.

- Şou-biznesdə irəli getmək üçün dəstək mütləqdir?

- Bəli, yaxşı mənada dəstək olmalıdır. Çünki dolayı yolla irəli getmək çətindir.

- Sizin bir dəstəyiniz olubmu?

- Mən hər şeyi öz gücümə etmişəm. Artıq
alışmışam. Evdə idarəçilik məndədir. Məni idarə etmək çətindir.

- Emilin nə vaxtsa sizdən ayrılacağı ağlınıza gələrmi?

- Emil onu nə vaxtsa etsə, yenə də canı sağ olsun. Mən hər şeyi sevgim üçün edirəm.

- Bəs Emil sizi sizin onu sevdiyiniz qədər sevirmi?

- Onu özündən soruşmaq lazımdır. Hər halda, bir-birimizə çox öyrəşmişik.

- Yatsanız, yuxunuza nə girməzdi?

- Yuxuma girməzdi ki, müğənni ilə ailə qurum.

- Bir kişi gözü ilə özünüzə baxanda nə görürsünüz?

- Düşünürəm ki, kişi gözü ilə baxsam, özümü bəyənmərəm. Çünki məndə kişi xarakteri çoxdur.

- Əliniz ətəyinizdə çox qalıb?

- Şükür Allaha ki, əlim həmişə göydə olub.

- Ürəyinizdən qəlbinizə axıb gedən nə oldu?

- Mən çox qürurlu insanam. Heç vaxt özümü sındırmamışam. Mənim ürəyimdə nə varsa, hamısını Emilə demişəm.

- Sizin üçün tərəzinin gözündə ağır gələn nədir?

- Mənəvi dəyərlər... İnsani keyfiyyətlərimi heç nəyə dəyişmərəm. Məni həyatda ayağa qaldıran düzgün olmağımdır.

- Sizin üçün əsrə bərabər gün olan hansı gün idi?

- Elə günlərim çox olub. Məsələn, mən Moskvada idim. Dedilər ki, Emilin vəziyyəti pisdir. Gələ bilmirdim, ürəyim partlayırdı. O gün getsin, gəlməsin.

- Bu gün şou-biznesdə niyə barmaqla göstərilənlərdən deyilsiniz?

- Mənim öz prinsiplərim var. Elə şeylər var ki, mən onları edə bilmərəm.

- Kaş ki, gözüm kor olaydı, onu görməzdim. Kimi?

- Həmişə Emilə deyirəm ki, kaş ki, gözüm kor olardı, səni görməz idim (gülür).

- Mən axı hardan biləydim ki,... Bu fikri özünüz tamamlayın, zəhmət olmasa.

- Mən hardan biləydim ki, evin ərköyün bir qızı bunları yaşayacaq. Hər şey bundan da gözəl ola bilərdi.



скачать dle 10.6фильмы бесплатно