Avropanın enerji sektorunda etibarlı tərəfdaş kimi tanınan Azərbaycanın Almaniya ilə əlaqələri ildən-ilə inkişaf edərək, yüksək səviyyəyə çatıb. Ölkə Prezidentimiz cənab İlham Əliyevin Berlinə işgüzar səfəri zamanı Almaniyanın aparıcı şirkətlərinin rəhbərləri ilə görüşü bir daha göstərdi ki, bu ölkənin dünyada öz sözünü deməyi bacaran şirkətləri Azərbaycanla yeni əməkdaşlıq əlaqələrinin yaradılmasına maraqlıdırlar. Ölkə Prezidentimiz Almaniyanın aparıcı şirkətlərinin rəhbərlərinin diqqətini bir daha Azərbaycana yönəldərək həm Xəzər dənizinin, həm İkinci Qarabağ müharibəsi nəticəsində işğaldan azad olunan ərazilərin, xüsusilə də Kəlbəcər və Laçının, həmçinin Naxçıvanın böyük enerji potensialı olduğunu qeyd edib. Yaxın vaxtlarda 500 meqavatlıq günəş-elektrik enerjisi stansiyasının tikintisi ilə bağlı bəzi addımların atılacağını vurğulayan Prezident cənab İlham Əliyev həmçinin bildirib ki, son 20 ildə iqtisadiyyatımız üç dəfədən çox artıb. Bu da dünya rekordu hesab oluna bilər.
İkitərəfli münasibətlərimizə çox böyük töhfə verən 2022-ci ilin iyulun 18-də Azərbaycan Respublikasının Prezidenti İlham Əliyev və Avropa Komissiyasının Prezidenti xanım Ursula Fon der Lyayen tərəfindən enerji sahəsində Strateji Tərəfdaşlığa dair Anlaşma Memoranduma əsasən, Azərbaycan 2027-ci ilə qədər təbii qazın təchizat həcmini ən azı iki dəfə artırmağı planlaşdırır. Bu sənəd, eyni zamanda, Azərbaycan ilə Avropa İttifaqı arasında bərpaolunan enerji sahəsində əməkdaşlığın inkişaf etdirilməsini nəzərdə tutur.
“Rusiya-Ukrayna müharibəsi başlayandan sonra bizə mövcud qaz təchizatının artırılması ilə bağlı 10-dan çox Avropa ölkəsindən müraciət olunub. Biz tərəfdaşlarımızın ehtiyaclarını qarşılamaq üçün hər şeyi edirik. Bizim qaz təchizatımızın artıq kifayət qədər şaxələndirilmiş coğrafiyası var”. Dövlət başçımızın söylədiyi bu sözlər təsdiq edir ki, Azərbaycan qazı Avropa üçün etibarlı və uzunmüddətli mənbədir.
Yerləşdiyi regionun lider dövləti olan Azərbaycan öz resursları hesabına inkişaf edir. Son iyirmi il ərzində enerji sektorunda müşahidə edilən iqtisadi artım dostluq, əməkdaşlıq və strateji tərəfdaşlıq istiqamətində inkişaf edən Avropa İttifaqı ölkələri ilə ikitərəfli münasibətlərin daha da dərinləşməsinə öz töhfəsini verir. Azərbaycan artıq Dünya Bankı, Avropa Yenidənqurma və İnkişaf Bankı və bir neçə başqa beynəlxalq maliyyə institutları ilə ilkin məsləhətləşmələrə başlayıb. Enerji satışından əldə etdilən vəsait hesabına nəqliyyat infrastrukturunda vacib işlər həyata keçirilir. Bərpaolunan enerji mənbələrinin böyük potensialı da xarici sərmayədarları ölkəmizə cəlb etməkdə davam edir.
Ölkə Prezidentimiz onu da vurğulayıb ki, BP Qarabağın azad olunmuş Cəbrayıl şəhərində 240 meqavat gücündə günəş enerji stansiyasının tikintisində birbaşa xarici sərmayədar olacaq. İstehsal olunacaq həmin enerji bizim enerji sistemimizə daxil ediləcək. Azərbaycanda elektrik enerjisi ilə bağlı mövcud daxili qiymətlər xarici sərmayədarlar üçün sərfəlidir.
Ən əsası isə Prezident cənab İlham Əliyevin Almaniyanın aparıcı şirkətlərinin rəhbərləri ilə görüşü yeni əməkdaşlıq əlaqələrinin inkişafına təkan verəcək.

Nurəddin İbrahimov,
YAP Gəncə şəhər təşkilatının sədr müaviniскачать dle 10.6фильмы бесплатно