- Mehparə xanım, necə oldu ki, bu sahəyə gəldiniz?
- Uşaqlıqdan bəri ən böyük arzularımdan biri ibtidai sinif müəllimi olmaq idi. Hətta uşaq vaxtlarımda başqa uşaqlara dərs keçdiyim zamanlar belə olub. Uşaqlara olan sevgim, səbrim və öyrətməyə duyduğum həvəs müəllimlik peşəsini mənim üçün digər peşələrdən daha üstündür. Hər gün bu peşəni daha çox sevirəm.
Müəllim kimi fəaliyyətə başladığım gündən əsas məqsədim, şagirdlərə yaxşı təhsil vermək və onların şəxsiyyət kimi formalaşmalarına dəstək olmaqdır. Dərslərimi standart qaydada keçmirəm; yaradıcı gənc müəllim olaraq, şagirdlərin dərsə marağını artırmağa və öyrənməyi öyrətməyə böyük önəm verirəm. Öz dərslərimdə şagirdlər üçün əyləncəli, maraqlı və inkişafetdirici metodlar tətbiq etməyə çalışıram. Ona görə bütün şagirdlərimin sevimli müəlliməsinə çevrilmişəm.
Gələcəyin təhsili əvvəl bizdən, sonra isə onlardan asılı olduğu üçün hər gün araşdırmalar aparır, ən uyğun metodları seçərək şagirdlərə yanaşıram. “Əsas məqsədim öyrətməkdir” şüarımla şagirdlər üçün müxtəlif tapşırıqlar və vəsaitlər hazırlayıram. Hazırladığım bu vəsaitlərdən bir neçəsi hal-hazırda kitab mağazalarında satışdadır. Bunlar arasında “Riyaziyyat 1-ci sinif (test toplusu)” Oxu Nəşriyyatı və “Azərbaycan dili - 1-ci sinif (oxuyub-anlama)” Buta Yayımları yer alır.
- Neçə ildir ki, bu sahədəsiniz?
- Universitetin ikinci ilindən etibarən yəni, 2019-cu ildən müəllim kimi fəaliyyət göstərirəm.
- İş prinsipiniz nədən ibarətdir?
- İş prinsipim, hər bir şagirdin fərdi potensialını aşkar etmək və onların öyrənmə prosesini maksimum dərəcədə effektiv hala gətirmək üzərində qurulub. Mənim üçün önəmli olan, standart metodlardan uzaqlaşıb, hər bir şagirdin fərqli öyrənmə tərzinə uyğun yanaşmalar tətbiq etməkdir. Əsas məqsədim, şagirdlərə yalnız bilik vermək deyil, həm də onlara öyrənməyi öyrətməkdir. Bunun üçün əyləncəli, maraqlı və inkişafetdirici öyrətmə metodları tətbiq edir, hər dərsin şagirdlərin diqqətini cəlb etməsini və onların marağını artırmasını təmin edirəm.
Eyni zamanda, şagirdlərin intellektual və emosional inkişafını dəstəkləyərək, onların maraqlarını inkişaf etdirmək, elmə və öyrənməyə həvəsləndirmək əsas hədəflərimdən biridir. Şagirdlərimin yalnız dərs materialını mənimsəməsi deyil, həm də analitik düşünmə, problem həll etmə və yaradıcı yanaşmalar inkişaf etdirməsi üçün də şərait yaradıram. Təhsil prosesində hər bir şagirdin fərqli bacarıqlarını ön plana çıxarmağa və onların gələcəkdə cəmiyyətə faydalı vətəndaşlar kimi formalaşmasına dəstək olmağa çalışıram.
- Bir mütəxəssis olaraq nəyə "yox" deyirsiniz?
- Bir mütəxəssis olaraq təhsildə standart yanaşmalara və monoton dərs metodlarına “yox” deyirəm. Şagirdlərin fərdi tələblərinə və öyrənmə tərzlərinə uyğunlaşmayan yanaşmaların onların inkişafını məhdudlaşdırdığına inanıram. Hər bir şagirdin özünəməxsus qabiliyyətləri və potensialı olduğu üçün onları standart çərçivələrə salmaq doğru deyil.
Eyni zamanda, təhsildə ədalətsizlik və bərabərsizliyə, şagirdlər arasında ayrı-seçkilik yaradan hər hansı bir yanaşmaya qarşıyam. Mən əzbərləmə əsaslı tədris metodlarına da “yox” deyirəm, çünki şagirdlərin tənqidi düşünmə və analitik bacarıqlarının inkişaf etdirilməsi daha vacibdir.
Texnologiyanın təhsilə inteqrasiyasını rədd edən və müasir yeniliklərdən uzaq duran yanaşmalara da qarşıyam. Texnologiya, təhsil prosesini zənginləşdirmək və daha interaktiv etmək üçün vacib bir vasitədir, buna görə də onun dərs prosesində yer almasına önəm verirəm. Bu prinsiplərə sadiq qalaraq, daha yaradıcı, ədalətli və effektiv tədris mühiti yaratmağa çalışıram.
- Son zamanlarda sizə daha çox nə ilə bağlı müraciətlər olur?
- Son zamanlarda mənə ən çox oxuma və yazmada çətinlik çəkən, diqqətini toplamaq problemi yaşayan, motivasiyası aşağı olan şagirdlərlə bağlı valideynləri tərəfindən müraciətlər gəlir. Valideynlər bu problemlərin övladlarının dərs nəticələrinə təsir etdiyindən narahatdırlar.
Bu vəziyyətlərdə şagirdlərə fərdi yanaşmağa çalışıram. Oxuma və yazmada çətinlik çəkənlər üçün daha maraqlı və sadə materiallar seçirəm, onları yazı yazmağa həvəsləndirmək üçün kiçik, amma maraqlı mövzular üzərində işləyirik. Diqqətini toplamaq problemi olan şagirdlər üçün dərsləri daha interaktiv və əyləncəli etməyə çalışıram ki, maraqları artsın. Motivasiya məsələsinə gəldikdə isə, hər bir şagirdin kiçik də olsa uğurlarını qeyd etmək, onları həvəsləndirmək üçün çox vacibdir. Əsas məqsədim, hər bir şagirdin öz potensialını kəşf etməsinə və bu problemləri aşmasına kömək etməkdir.
- Oxuculara nə məsləhət görürsünüz?
- Oxuculara məsləhətim budur ki, hər zaman öyrənməyə və inkişaf etməyə açıq olun. Öyrənmə prosesi yalnız məktəb illəri ilə məhdudlaşmır, həyat boyu davam edir. Müəllimlər üçün isə bu daha çox önəmlidir. Çünki şagirdlərin fərdi ehtiyaclarına diqqət yetirmək və onları dinləmək çox vacibdir. Hər bir şagirdin potensialını aşkar etmək və onlara öyrənməyi sevdirmək üçün çalışmaq lazımdır.
Eyni zamanda, motivasiya və pozitiv yanaşmanın gücünü heç vaxt kiçiltməyin. Kiçik uğurları belə qeyd etmək, həm sizin, həm də şagirdlərinizin ruh yüksəkliyini artıracaq. Təhsildə yaradıcı və interaktiv metodlara üstünlük verərək, öyrənməyi həm əyləncəli, həm də faydalı hala gətirin.
- Mən bu sahəyə gələrkən, ağlıma gəlməzdi ki,.. Bu fikri özünüz tamamlayın, zəhmət olmasa.
- Mən bu sahəyə gələrkən, ağlıma gəlməzdi ki, bəzən şagirdlərimin ən kiçik uğurlarına belə həvəslənib sevinc hissi keçirəcəyəm və onların inkişafında bu qədər böyük bir rol oynayacağam. Onların gözlərindəki qığılcımı görmək, öyrəndiklərini tətbiq edərək irəlilədiklərini izləmək mənə inanılmaz bir sevinc bəxş edir.
Biz bilirik ki, müəllim təkcə bilik vermir, həm də şagirdlərin inkişafını dəstəkləyir, onlara öyrənməyi sevdirir və hər birinin fərdi bacarıqlarını ortaya çıxarmağa kömək edir.

Əlaqə nömrəsi: (050) 321-51-24
İnstahgram: Teacher_muradova
Email : [email protected]