- Nigar xanım, necə oldu ki, bu sahəyə gəldiniz?

- Uşaqlıq arzum idi. Əlbəttə,valideynlərim də həkim olmağımı istəyirdi. Ona görə də bu sahəni seçdim.

- Artıq neçə ildir ki, bu sahədəsiniz?

- Artıq 25 ildir ki, bu sahədəyəm.

- İş prinsipiniz nədən ibarətdir?

- İş prinsipim Hippokrat andına çox uyğun gəlir. Yəni günün hansı vaxt olmasından, xəstənin sosial vəziyyətindən, mənim şəxsi problemimdən asılı olmayaraq xəstəyə diqqət göstərmək.

- İnsanlar sizə daha çox nə ilə bağlı müraciət edirlər?

- Əlbəttə, ixtisasıma uyğun olaraq mənə, əsasən, qadın xəstəlikləri ilə əlaqədar müraciətlər olur. Ancaq bəzən səhiyyənin başqa istiqamətləri, hətta tamam ayrı həyati məsələlərlə bağlı müraciətlər də olur, bunu tam təbii hesab edirəm.

- Öz sahəniz üzrə hansı işləri icra edirsiniz?

-Demək olar ki, bütün işləri. Zərurət olanda tibb bacısının, hətta anestozoloqun,cərrahın bəzi missiyalarını icra etməli oluram.

- Xarakter olaraq necə birisiniz?

- Bunu daha dəqiq ətrafımdakılar deyə bilər, deyilənə görə,sabit, tədbirli, ünsiyyətcil adamam. Xəstələrin sağlamlığa qovuşmasına israrlıyam.

- Ailəlisinizmi?

- Bəli. Bir oğlum var.

- Bir həkim olaraq olaraq nəyə "yox" deyirsiniz?

- Çox şeyə-çarəsiz xəstəliklərə, ruhdan düşən xəstələrə, ümidsizliyə, bədbinliyə-bunlar həkimin funksiyalarına mane olan amillərdir. Ancaq ən çox cahilliyə, səhhətə laqeyd yanaşmaya, düşünmədən atılan addımlara, öz sağlamlığını təsadüfi adamlara etibar etməyə “yox” deyirəm. Həyatımızı əlimizdən alan, həyatımızı zəhərləyən xəstəliklərə "yox" deyirəm. Bir də ki, qız övladlarını erkən yaşda ailə qurmağa vadar edən valideynlərə demək istəyirəm ki, övladlarınıza yazığınız gəlsin. Belə etməyin! Övladlarınızı bədbəxçiliyə sürükləməyin! Eyni zamanda hamilə xanımlara çox diqqətlə yanaşılmasını istərdim. Onları stressdən uzaq saxlayaq. Çünki gələcək körpənin həyatı təhlükədə ola bilər. Bu mövzularda maarifləndirmək və maariflənmək çox önəmlidir.

- Oxuculara nə məsləhət görürsünüz?

- Allahın insan bəxş etdiyi ən dəyərli nemətin cansağlığı olduğunu, tanrının verdiyi bu əmanəti qorumağa borclu olduğumuzu, həm də sağlamlığı qorumağın onu müalicə etməkdən asan başa gəldiyini unutmasınlar.

- Mən bu işi seçərkən ağlıma gəlməzdi ki,.. Bu fikri özünüz tamamlayın, zəhmət olmasa.

- Mən bu sənəti seçərkən ağlıma gəlməzdi ki, bu qədər çətin, məsuliyyətli, ağır bir yükün altına çiyin verirəm. Ancaq ən çox peşmanlıq yaradan bəzi xəstələrin cahillikdən, bilməməzlikdən özünü çıxılmaz vəziyyətə salması, ancaq bu halda həkimə müraciət etməsi olur. XXI əsrin 20-ci illərini yaşasaq da, bəzi adamlar hələ də XIX əsrdədirlər. Hələ də onun-bunun sözü ilə “müalicə” olunur, hələ də səhiyyənin imkanlarına şübhə ilə yanaşır, necə deyərlər,”nadanlıq ilə vidalaşmaq istəmirlər”. Pandemiyanın acı nəticələrində bunu çox müşahidə etdik...

Əlaqə nömrəsi: (051) 583 78 76