- Şamama xanım, niyə məhz psixoloq oldunuz?

- Əslində psixologiyaya olan marağım birinci ixtisasım olan ibtidai sinif müəllimliyindən irəli gəlir. Orta məktəb təcrübələrində iştirak etdiyim müddətdə uşaqlarla ünsiyyətdə psixoloji biliklərin də vacib olduğunu kəşf etdim. Bir müəllim hər bir şagirdə fərdi yanaşma etmək üçün ən azı uşaq psixologiyasını, onların valideyinləri ilə düzgün ünsiyyət qurması üçün isə ümumi psixologiyanı bilməlidir. Bu fikirdən yola çıxaraq ilk öncə uşaq psixologiyası, sonra isə ümumi psixologiya üzrə təhsil almağı hədəflədim.
 
- Neçə ildir ki, bu sahədəsiniz?

- Daha öncə də qeyd etdiyim kimi, müəllim kimi təhsil aldığım dövrdən bəri psixologiya ilə maraqlanıram. Uzun müddətdir ki, psixologiya üzrə təhsilimi tamamlayıb fəaliyyətə başlamışam. Bu gün də bu sahədə araşdırmalarımı aparıram və yeni biliklər əldə etməyə davam edirəm.

-  Hansı metodlarla çalışırsınız?

 - İnsan bədənində hər bir orqanın öz həkimi olduğu kimi ruhun həkimi də psixoloqlardır. Necə ki, hər həkim öz sahəsinə uyğun araşdırma aparıb diaqnoz qoyur, biz də pasiyentlərimizə fərdi qaydada yanaşıb ona uyğun metodları tətbiq edirik. Psixologiya elə bir sahədir ki, qarşımızdakı insana fərdi yanaşılmalıdır və təbii olaraq konkret bir metod hər kəs üçün keçərli deyil. Ümumilikdə müşahidə, dinləmə, təhlil metodlarını istifadə edirəm.

- Bir psixoloq olaraq sizi narahat edən hansı məsələlərdir?

- Nəzərə alsaq ki, uşaqlar bizim gələcəyimizdir o zaman uşaqlarda müşahidə etdiyimiz problemlər məni daha çox narahat edir. Burada uşaqlarda olan telefon asılığı, aqressiya, içinəqapanıqlılıq və bu kimi digər mənfi halları qeyd edə bilərəm. Çox təəsüf hissi ilə bildirirəm ki, bu gün günahlandırdığımız valideyinlər  dünənin düzgün yetişdirilməmiş uşaqlarıdır. Dolayısı ilə uşaqlara qarşı səhv yanaşma və valideyinlər tərəfindən özlərinə lazım olan şəxsi psixoloji dəstəyi qəbul etməmələri məni narahat edir. Bu gün valideyin və mütəxəssis olaraq uşaqları düzgün yönəltməsək, cəmiyyət üçün gələcəyin problemli fərdlərini yetişdirmiş olarıq.

 - Yaxşı psixoloq olmaq üçün nə etmək lazımdır?

- Bir psixoloq özü güclü psixologiyaya sahib olmalıdır. Bunun üçün ən vacibi səbr və dinləmə bacarığıdır.Psixoloq qarşısındakını yarqılamadan dinləməli və lazımi peşəkar dəstəyini əsirgəməməlidir. Çünki, bizə müraciət edən insanların əksəriyyətinin ən çox dinlənməyə və motivasiyaya ehtiyacı var. Ona görə də, peşakar bir psixoloqun ən güclü tərəfi yaxşı dinləyici olmasıdır.

- Ailəlisinizmi?

- Bəli, ailəliyəm. İki övladım var.

-  Necə bir xarakterə sahibsiniz?

 - Mübarizə ruhu çox yüksək olan bir insanam. Hədəflərimdən və məqsədlərimdən əsla vaz keçmərəm. Bir şeyi əldə etmək istəyirəmsə, mütləq bir yolunu taparam. Qısaca, xarakterimi özətləsəm, disiplinli və inadçı deyə bilərəm.

 - Mən bu peşəni seçərkən aglıma gəlməzdi ki,.. Bu fikri özünüz tamamlayın, zəhmət olmasa.

 - Mən bu peşəni seçərkən aglima gəlməzdi ki, insanlara faydalı olmaq bu qədər zövqlü və sevindiricidir! Pasiyentlərimdən aldığım müsbət rəylər və nəticələr məni daha çox öyrənməyə sövq etdi. Nəticədə Yaşam Kouçu və təlimçi olaraq təhsilimi başa vurub daha geniş kütləyə faydalı olmağa nail oldum.

Əlaqə nömrəsi: (055) 398 54 04

скачать dle 10.6фильмы бесплатно