- Sevinc xanım, necə oldu ki, həkim oldunuz?

- Uşaqlıqda elə bilirdim ki, həkimlikdən və müəllimlikdən başqa sənət yoxdur. Baxmayaraq ki, bizim ailədə hamı iqtisadçıdır, amma nədənsə mənim beynimə yeritmişdilər ki, həkim olacaqsan. Oldum. Məndən sonra xalam uşaqları da bu peşəyə yiyələndilər.

- Niyə məhz stomatologiyanı seçdiniz?

- Anam mənə demişdi ki, müalicə işini seçərsən. Mən də demişdim ki, onda psixiatriyanı seçəcəyəm. Razı olmamışdı. O da olmayınca, valideynlərimdən xəbərsiz stomatologiyanı yazdım və qəbul oldum. İndi deyirlər ki, nə yaxşı bu sahəni seçmisən.

- Artıq neçə ildir ki, bu sahədəsiniz?

- Universiteti 2010-cu ildə bitirmişəm. Amma dördüncü kursdan etibarən artıq işləməyə başladım.

- Xarakter olaraq necə birisiniz?

- Səmimi və dürüst biriyəm. Pasientlərə pul mənbəyi kimi yox, öz doğmam kimi yanaşıram. Çalışıram ki, öz işimlə cəmiyyətə bir fayda verim. İnsanın nəyəsə yararlı olduğu halda xoşbəxt sayılır.

- Əllərinizlə kifayət qədər insana sağlamlıq bəxş etmisiniz. Hərdən o əllərə baxanda nə düşünürsünüz?

- Düşünürəm ki, irəlidə görüləcək çox işlər var.

- Bir həkim olaraq nəyə "yox" deyirsiniz?

- Pasientin sağlamlığına ziyan vura biləcək hər şeyə yox deyirəm.

- Nədən qorxursunuz?

- Allahımdan və həyatı boş yaşamaqdan qorxuram.

- Sizin üçün nə olmamalı idi, amma oldu?

- Düşünürəm ki, olacaqlar oldu. Nə olursa, yəqin ki, yaxşılığa doğru olur.

- Ağ xalatı geyinməyəndə özünüzü necə hiss edirsiniz?

- Adi geyimlə heç bir fərqi yoxdur. Əsas münasibətdir.

- Bir həkim olaraq sizi narahat edən məsələ nədir?

- İnsanların tibbi biliklərinin çox az olması və öz hüquqlarını bilməməkləri məni çox narahat edir.

- Ailəlisinizi?

- Bəli, ailəliyəm. İki övladım var.

- Ailə həyatı ilə bu iş alınırmı?

- Mənim yoldaşım da stomatoloqdur. Yəqin ki, başqa peşənin sahibi olsa idi, çox çətin olardı.

- Övladlarınızın həkim olmağını istərdinizmi?

- Məsləhət görərəm, amma seçimi özlərinə buraxaram. Çünki insan sevmədiyi işlə məşğul olanda özünü natamam hiss edir.

- Bəs siz stomatoloq olmasa idiniz, hansı sahəni seçərdiniz?

- Psixoloq olardım.

- Yatsanız, yuxunuz nə girməzdi?

- Sizi inandırım ki, indiyə qədər nə istəmişəmsə, hamısını əldə etmişəm. Buna görə Allahımdan çox razıyam və şükr edirəm.

- Dartıb özünüzlə apara bilmədiyiniz bir "yük"ünüz varmı?

- Yəqin ki, var. Çünki hər kəsin uşaqlıqda aldığı bir travma olur və insana bütün həyatı boyu təsir edir.

- Öz əlinizlə baltalanmısınızmı nə vaxtsa?

- Xeyr, elə bir məqam olmayıb.

- Qadın adlı bir varlığı tam dərk edə bilmisinizmi?

- Əlbəttə, etmişəm. Kişi ilə qadın tam fərqli məxluqlardır. Baxış tərzləri, düşüncələri, reaksiyaları tam fərqlidir. Kişilər hər şeyə mexaniki yanaşır. Qadınlar isə hissiyatla davranırlar. Bəlkə də bu, onların ən zəif cəhətidir. Amma qadınlar həm ağıl, həm də sağlamlıq baxımından kişilərdən üstündürlər.

- Hisləriniz sizi aldadıbmı?

- Mən realist insanam. Hislərimə hərəkət etmirəm (gülür).

- Mən Hippokrat andı içərkən ağlıma gəlməzdi ki, bu fikri tamamlayın, zəhmət olmasa.

- Ağlıma gəlməzdi ki, nə vaxtsa o andı yerinə yetirərəm, o anda həmişə sadiq qalaram.

Həkimlə əlaqə: (051) 8043454; (051) 5034141