İşğal olunmuş ərazilərimizin düşməndən azad edilməsi istiqamətində uğurlu hərbi əməliyyatlarda iştirak edən qəhrəmanları tanıtmaq məqsədilə həyata keçirilən “Tarix yazan igidlərimiz” layihəsi Bakı şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin M.Ş.Vazeh adına Mərkəzi Kitabxanası tərəfindən davam etdirilir.

Kitabxananın İnformasiya-resurs şöbəsi tarixi qələbəyə öz adını göstərdiyi qəhrəmanlığı ilə yazdıran şəhid Orucov Nemət haqqında videoçarx hazır etdi.

Videoçarxda şəhidin həyatı və hərbi fəaliyyəti ilə bağlı məlumatlar, fotolar nümayiş edilir.

Şəhid Orucov Nemet Əkbər oğlu 1994-cü il 15 noyabr tarixində Goranboy rayonunun Qaraçılar kəndində anadan olmuşdur. Orucov Nemət 2001-ci ildə Goranboy rayon Qaraçinar kənd tam orta məktəbində təhsil almağa başlamışdır. O həm təhsili, həm də tərbiyəsi ilə məktəb kollektivi arasında nümunəvi bir şagird olmuşdur.

Şəhid Orucov Nemət 2011-ci ildə orta təhsilini başa vurmuş və 2012-ci ildə isə Azərbaycan Texnologiya Universitetinin Ekologiya mühəndisliyi ixtisası üzrə ali məktəbə qəbul olmuşdur.

2016-ci ildə ali məktəbi bitirmiş və elə həmin ilin iyun ayında hərbi xidmətə yollanmışdır. O, 2017-ci ildə xidmətini kəşfiyyatçı kimi başa vuran Nemət, 2018-ci ildən müddətdən artıq hərbi xidmətə yollanaraq xidmətini leytenant kimi davam etdirmişdir.

Orucov Nemət hərbi fəaliyyəti zamanı sərrast atıcılıq qabiliyyəti ilə yoldaşlarından seçilirdi. O, zabitlik kursunu bitirdikdən sonra Beyləqan və Ağcabədi rayonlarında post komandiri vəzifəsində çalışmışdır.

Nemətin ailəsi Kəlbəcər rayonundan məcburi köçkündür. Onun hərbiçi olmaq istəməsinin əsas səbəbi də ata-baba yurdunun düşmən tapdağında olması idi. O, Qarabağ torpaqlarını azad edərək erməni təcavüzkarlarından qisas almaq istəyirdi.

Orucov Nemət xidmət müddətində qazandığı nailiyyətlərinə görə bir çox fəxri fərmana layiq görülmüşdür. O, 17 noyabr 2018-ci ildə Azərbaycan Ordusunda "Ən yaxşı motoatıcı bölük " adı uğrunda keçirilən yarışlarda yüksək nəticələr əldə etdiyinə görə və 3 mart 2019-cu ildə hərbi hissənin yaranmasının 27-ci ildönümü münasibəti ilə döyüş və ictimai siyasi hazırlıqda əldə etdiyi nailiyyətlərə görə fəxri fərmanları ilə təltif olunmuşdur.

Qəhrəman Orucov Nemət hər zaman Mübariz İbrahimovu özünə nümunə götürmüşdür. Şəhidlik zirvəsinə ucalmaq isə Nemətin tək arzusu imiş.

Azərbaycan Ordusunun leytenantı olan Nemət Orucov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin azadlığı uğrunda gedən döyüşlərdə savaşmış, ordumuzun əks hücumu zamanı şücaətini göstərərək düşmənin iki postunu darmadağın etmişdir.

Döyüş zamanı Orucov Nemət ağır yaralanmışdı. Döyüş yoldaşları ona dəstəyə gələrkən gülümsəmiş və həmin an əli ilə işarə edərək onlara bu sözləri söyləmişdir:

“Gəlməyin! Mən şəhadətə qovuşuram.”

28 sentyabr 2020-ci il tarixində şəhid Orucov Nemət son mənzilə yola salınmışdır. Məzarı Goranboy rayonunda yerləşən Zeyvə kənd qəbristanlığındadır.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikası Prezidenti İlham Əliyevin 15.12.2020-ci il tarixli Sərəncamına əsasən Nemət Orucov ölümündən sonra "Vətən uğrunda" medalı ilə təltif edilmişdir.

Torpaqlarımızın azadlığı uğrunda canını fəda edərək şəhid olan igidimiz haqqında hazırlanmış videoçarx aşağıdakı YouTube linkində yerləşdirilmişdir.

https://www.youtube.com/watch?v=f3Ij6WoBX0I

Ruhun şad olsun, Şəhidim!!!

Azərbaycan xalqının gələcəyi üçün etdiyin fədakarlığa görə minnətdarıq və ruhun qarşısında baş əyirik.