- Mədinə xanım, necə oldu ki, xanəndə oldunuz?

- Kiçik yaşlarımdan musiqiyə həvəsim çox idi. Ailəm də bu marağımı və səsimi kəşf edib məni Sabunçu rayonu 4 nömrəli musiqi məktəbinə yazdırdılar.

- Harada və kimlərdən təhsil alırsınız?

- Sabunçu rayonu 4 nömrəli musiqi məktəbində, xanəndə Səbinə Ərəblidən dərs alıram.

- Bir xanəndə olaraq özünüzdə hansı fərqlilikləri görürsünüz?

- Hələ ki, bu yolda yeni-yeni addımlamağa başlamışam. Ona görə də özümdə xüsusi bir fərqlilik görmürəm. Profesional xanəndə olmaq üçün çalışan, hələ ki, yalnız öyrənmə mərhələsində olan həvəskar xanəndə olduğumu düşünürəm.

- Yaxşı xanəndə olmaq üçün nə etmək lazımdır?

- Yaxşı xanəndə olmaq üçün, ümumiyyətlə işinin ustası olmaq üçün o işə ürək qoymaq lazımdır. Elmdə təkrar biliyin anası olduğu kimi, xanəndəlikdə də təkrar önəmli ünsürlərdəndir. Həm daha düzgün ifa üçün, həm də səsin açılması üçün muğamlarımızı tez-tez təkrarlamaq mütləqdir.

- Başqa bir peşəniz varmı?

- Hələ ki, orta məktəb şagirdiyəm. Amma zamanı gəldiyində profesional xanəndə olmaq və böyük səhnələrdə peşəkar ifaçılarla çıxış etmək arzumdur.

- Gələcəkdə özünüzü harada görürsünüz?

- Gələcəkdə özümü xalqının, tamaşaçılarının könlündə xüsusi yer tutmuş muğam ifaçısı kimi, böyük səhnələrdə görürəm. Həmçinin sənətini şagirdlərinə öyrətmək üçün əlindən gələni edən bir muğam müəllimi kimi də özümü görmək istərdim.

- Hansı müsabiqələrədə iştirak etmisiniz?

- Bir çox müsabiqələrdə iştirak etmişəm. 2020-ci ildə keçirilən III Beynəlxalq World Harmony müsahibəsində həmyaşıdlarım arasında I yerə layiq görülmüşəm. Bakı Şəhər Mədəniyyət Baş İdarəsi tərəfindən təşkil olunmuş, faşizm üzərində qələbənin 75 illiyi münasibətilə keçirilən, 9 May - Qələbə Gününə həsr olunmuş “Qələbəyə doğru!” müsabiqəsində Fəxri Fərmana layiq görülmüşəm. Gənclərin Respublika Bədii Yaradıcılıq Evi tərəfindən keçirilən "Vətən yaxşıdır" müsahibəsində diplomla təltif olunmuşam. Daha sadalamadığım bir çox diplom və təltifnamələrim mövcuddur.

- Son olaraq nə demək istəyirsiniz?

- Son olaraq xanəndə müəllimim Səbinə xanım Ərəbliyə, Sabunçu rayonu 4 nömrəli musiqi məktəbinin kollektivinə, təhsil aldığım Sabunçu rayonu 67 nömrəli tam orta məktəbin kollektivinə, İstedadları Tanıyaq və Tanıdaq İctimai Birliyinin bütün nümayəndələrinə, ailəmə və qohumlarıma salamlarımı çatdırıram. Qeyd etmək istəyirəm ki, mənə əziz olan insanların dəstəyi mənim üçün olduqca önəmlidir. Ona görə də hər zaman hər birini dəstəkçim olaraq görməyi diləyirəm.






скачать dle 10.6фильмы бесплатно