- Mehparə xanım, necə oldu ki, həkim oldunuz?

- Mən həkim ailəsində böyümüşəm. Anam, əmilərim, xalam müxtəlif sahələr üzrə həkim idilər - cərrah, ginekoloq, kardioloq və s. Başqa bir sahə barədə heç vaxt düşünməmişəm. İki bacıyıq. Hər ikimiz də həkim olduq. O, kardioloq, mən isə cərrah- mama ginekoloq.

- Artıq neçə ildir ki, bu sahədəsiniz?

- 1991-ci ildə Tibb Universitetini bitirən kimi Şamama Ələsgərova adına 5 saylı doğum evində bu günə qədər işləmişəm. Hal-hazırda "Caspian İnternational" hospitalda fəliyyət göstərirəm. Artıq 30 ildir ki, bu sahədəyəm.

- Əsas iş prinsipiniz nədir?

- Əsas iş prinsipim xəstələr tərəfindən sevilmək, mənə olan inamı doğrultmaq və pasientləri körpələri ilə birlikdə sağ-salamat evə yola salmaqdır.

- İnsanlar sizə daha çox nə ilə bağlı müraciət edirlər?

- Mən mama-ginekoloqam. Mənə sonsuzluqla, doğumla, keysəriyyə ilə, bir çox ginekoloji xəstəliklər və əməliyyatlarla bağlı müraciətlər olur. Bir sözlə, öz sahəmə aid olan hər bir çətinliyi aradan qaldırmağa çalışıram və bu məndə, zənnimcə, uğurlu alınır. Çünki pasintlərin məmnunluğunu hər zaman müşahidə edirəm.

- Xarakter olaraq necə birisiniz?

- Əslində mülayim biriyəm. Amma ideal insan yoxdur. Mənim də özümə görə çətin xarakterlərim var.

- Ailəlisinizmi?

- Bəli, ailəliyəm. İki övladım var.

- Bir həkim olaraq nəyə "yox" deyirsiniz?

- Bir həkimin bacarmadığı işlərə girişməyinə "yox" deyirəm. Öyrənmək heç bir yaşda gec deyil və ayıb sayılmır. Pasientlərə qarşı dürüst olmaq lazımdır. Söhbət insan sağlamlığından, insan həyatından gedirsə, həkimliyi biznesə çevirmək olmaz!

- Oxuculara nə məsləhət görürsünüz?

- Oxuculara məsləhət görürəm ki, həyat o qədər qısa, həm də gözəldir ki, ən kiçik şeylərdən də zövq almağı və sevinməyi bacarın. Söz-söhbət, dedi-qodu sağlamlığınıza da ziyandır. Ətrafa gözəlliklərlə baxaraq "yaşamağa dəyər", deyin və elə yaşayın ki, arxaya baxanda təəssüflənməyəsiniz.

- Mən bu işi seçərkən ağlıma gəlməzdi ki,.. Bu fikri özünüz tamamlayın, zəhmət olmasa.

- Ağlıma gəlməzdi ki, pasientlərim tərəfindən bu qədər sevilərəm. Deyilən hər gözəl, xoş söz mənim üçün stimuldur.

Əlaqə nömrəsi: (050) 546 31 55