- Aysel xanım, zamam sizi haradan hara gətirdi?

- Zaman mənim üçün çox dəyərli məfhumdur. Hesab edirəm ki, olduğum yerə gətirdi.

- Öz istəyinizləmi həkim oldunuz?

- Bəli, öz istəyimlə oldum. Amma həkim olmasa idim, yəqin ki, diplomat olardım. Amma yaxşı ki, həkim oldum. İşimi çox sevirəm.

- Artıq neçə ildir ki, bu sahədə çalışırsınız?

- Artıq doqquz ilə yaxındır ki, bu sahədə fəaliyyətdəyəm.

- Bu doqquz ilə nəyi sığışdıra bilmədiniz?

- Bizim sahə dayanmadan inkişaf etməkdədir. Bu zamana konkret olaraq nəyisə sığışdırmaq mümkün deyil. Ona görə də, biz tibbdə olan yenilikləri həmişə təqib və tətbiq edirik.

- Xarakter olaraq necə birisiniz?

- Kənardan baxanda çox mülayim biri kimi görünürəm. Amma əslində tələblar və sərt biriyəm. Dəqiqliyi çox sevirəm. Bu da yəqin ki, peşəmlə əlaqədardır. Mənə yalan danışmaq bir çox hallarda mümkün olmur.

- Bir həkim olaraq nəyə "yox" deyirsiniz?

- Ümumiyyətlə, "yox" deməyi bacarmaq yaxşı xüsusiyyətdir. Konkret olaraq deyə bilmərəm, amma bir çox şeyə "yox" deyirəm. "Yox" dan sonra "hə" deyə bilərəm, amma "hə"dən sonra "yox" deməyi sevmirəm.

- Ağ xalat sizə nə verdi, sizdən nə aldı?

- Ağ xalat məndən heç nə almadı. Bircə tələbə vaxtı bir tərəfini ütüləyərkən, bir tərəfini qırışladarkən əsəbləşib boşuna sərf etdiyim sinirlərdən başqa (gülür). O gündən bu yana paltar ütüləməklə aram yoxdur. Amma humanizm hissimi artırdı. İnsanları çox sevirəm. Onların kədərli, narahat baxışlarından sonrakı dönəmdə gözlərindəki sevinci görmək mənə zövq verir.

- Nədən qorxursunuz?

- Qorxularımı açıqlamağı sevmirəm. Onları hər zaman üstələməyə çalışıram.

- Bir həkim olaraq sizi narahat edən məsələ nədir?

- Tibb hər gün inkişaf etsə də, xəstəliklər də bir o qədər çoxalır. Bu, məni narahat edir. İnsanlar ilk növbədə öz qidalanmaqlarına fikir verməlidirlər. Bir çox xəstəliklərin baş qaldırmasının əsas səbəblərindən biri də məhz düzgün qidalanmamaqdır.

- Ailəlisinizmi?

- Xeyr, subayam.

- Hər bir həkimin işləmə mexanizmi var. İş prinsipiniz nədən ibarətdir?

- Bizim işdə dəqiqlik çox önəmlidir. Nəzərdən qaçan xırda bir məqam da insanın sağlamlığına ciddi ziyan vura, hətta həyatı bahasına başa gələ bilər. Bu baxımdan, dəqiqliyə çox önəm verirəm.

- Oxuculara nə məsləhət görürsünüz?

- Oxuculara səbrli olmağı arzu edirəm.

- Mən Hippokrat andı içərkən ağlıma gəlməzdi ki,.. Bu fikri özünüz tamamlayın, zəhmət olmasa.

- Mənim üzərimə düşən hər bir işdə vicdanımla çalışıram və böyük məsuliyyət hiss edirəm. Bunun üçün mənim vicdanımın səsi rol oynayır. Simvolik olaraq içdiyim andın heç bir rolu yoxdur.

Həkimlə əlaqə: (055) 2554133